O pasado sábado tivo lugar un Des-Concerto Expansivo promovido
pola Plataforma socio-cultural Burla Negra, que se desenvolveu de xeito
simultáneo en numerosas vilas e cidades galegas, coincidindo co 10º aniversário
da “Marea da Dignidade”, que ao berro de “Nunca Máis”, enchía as rúas de
Compostela o 1 de decembro de 2002.
Desde o Colectivo Buril quixemos sumar-nos a esta iniciativa e por iso organizamos
unha Xornada
pola Dignidade que comezou cun magosto e unha chourizada realizada
diante do noso local social, na Praza de Abastos de Burela. Soci@s do colectivo
asaron castañas ao xeito tradicional que foron repartidas gratuitamente entre
todas as persoas asistentes.
Ás 22:30 horas, daba comezo o Des-Concerto Expansivo da man da agrupación
de latin-jazz Marosa Jazz Project (MJP)
que interpretou algúns dos standars
de jazz máis coñecidos. A seguir, o quinteto burelao Medio Quinhón fixo un percorrido por distintas pezas da música
tradicional e tamén por algunha composición do seu repertorio.
Antes de dar paso ás outras agrupacións , a presidenta do Buril, Rosana
Valle, deu leitura ao Manifesto contra o
Silencio, de Manuel Rivas, que foi lido simultaneamente nas distintas vilas
que se sumaron ao Des-Concerto Expansivo e que reproducimos abaixo.
A seguinte agrupación en actuar foi o grupo local Skolhma, que interpretaron temas propios e tamén fixeron versións
de Patti Smith, Lou Reed, Terbutalina... Xa para finalizar, o grupo mariñao de hardcore
The Broken Revenge presentou os seus
temas nunha potente posta en escea, deixando un moi bo sabor de boca entre
todas e todos os asistentes.
Manifesto contra o Silencio
Manuel Rivas
Atención. En todas as esquinas da Vía Sacra de Neón hai hoxe un concerto
expansivo.
Emitimos acordes contra a adversidade.
Emitimos contra a mercadoría perigosa da mentira.
Emitimos contra a maquinaria pesada da propaganda.
Emitimos contra o rexistro bruto da incompetencia.
Emitimos contra un goberno rancoroso, feo, ameazante.
Emitimos na onda libre dos cans da noite,
na alegre radiofonía secreta das sereas
e na frecuencia do corvo de Allan Poe
que peteira en morse a clave que nos une: Nunca Máis!
Rescatamos do naufraxio unha orgullosa bandeira ennegrecida.
Rescatamos os instrumentos de soñar.
Rescatamos os tesouros roubados.
Rescatamos un mascato chamado liberdade.
Rescatamos o cormorán cristado da dignidade.
Rescatamos as cancións na fonoteca invencible do mar.
E rescataremos a verdade.
A verdade sairá a flote no país das barcas de pedra.
Facemos probas de son coa esperanza.
Atención.
Estamos a emitir ex conxuros solidarios.
Estamos a confortar o noso corazón
e a facer máis forte ao noso pobo.
Porque Galicia non ten prezo. Xa non ten prezo.
Facemos probas de son coa liberdade.
Un, dous, tres! Probando! Nunca Máis!
O Colectivo Cultural Buril organiza umha Jornada pola Dignidade para o próximo sábado, 1 de dezembro, na praça de Abastos de Burela, a partir das 19:00 horas. A jornada começará com um Magusto Popular, onde se repartirám castanhas assadas de graça a todas as pessoas assistentes. Às 22:00 horas, lera-se um manifesto simultáneo e às 22:30 horas, dará começo o Des-Concerto Expansivo a cargo das bandas Marosa Jazz Project, Medio Quinhón, Skohlma e The Broken Revenge. Os concertos serám de balde e serviram-se bebidas a preços populares.
Com esta actividade, o Buril quer somar-se ao Des-Concerto Expansivo programado pola plataforma socio-cultural Burla Negra, coincidindo com o 10º aniversário da Marea da Dignidade que enchia as ruas de Compostela o 1 de dezembro de 2002, para protestar ante a incompetência das pessoas responsáveis pola nefesta gestom na catástrofe ecológica do petroleiro Prestige nas costas galegas. Dez anos depois, quer-se rememorar o célebre Concerto Expansivo que tinha lugar o 1 de Fevereiro de 2003, no que se celebrarom mais de 150 actuaçons musicais, teatrais, plásticas e audio-visuais simultáneas por toda a Galiza. Tal como informa a Burla Negra desde o seu web, trata-se de umha iniciativa aberta a toda formaçom musical, teatral ou artística em regime de auto-organizaçom e a todas as salas, bares, espaços, colectivos... que se queiram somar.
A próxima fin de semana chega ao seu fin a programación teatral de outono organizada polo Colectivo Cultural Buril. A cita teatral terá lugar osábado 27 de outubro ás 20hno Auditorio da Casa de Cultura de Burela co espectáculo"Radio Universo" representado por Nostrum Cai Teatro.
A compañía Nostrum Cai tén unha traxectoria de máis de dez anos no panorama teatral galego e tén realizado numerosos espectáculos de danza e teatro. A compañía está formada por seis intérpretes baixo a dirección de Lola Fernández."Radio Universo" é un guión de teatro radiofónico creado polo Grupo Chévere e adaptada para a representación por Nostrum Cai Teatro.
Sinopse de "Radio Universo"
Século XXV. Galicia é o único país do planeta onde os niveis de clonación alcanzan a perfección máis alá do clon número 200 da mesma persoa. A industria da clonación creceu arredor dos experimentos realizados na figura do Primeiro Presidente. Unha estirpe de clons do Primeiro gobernan o país dende o século XXI. Mentres se resolvían os últimos casos do moco de pavo nas granxas de Cloren, comezou a tomar forma un novo perigo: a morriña, enfermidade que ataca fatalmente aos galegos dentro da súa propia terra. Ante tal situación CLONTINENTE, a empresa creada polo Primeiro Presidente, anuncia un plan de choque para solucionar o problema, O PLAN LEDICIA: “enviaremos unha misión tripulada a bordo do cruceiro interestelar LALÍN 2000 para demostrar que o universo é curvo”.
RADIO UNIVERSO, a emisora galega no espacio exterior, con MariCastaña e SuperCarballeira, é a encargada de facer o seguimento da travesía do Cruceiro Interestelar.
A representación desta obra enmárcase dentro do programa Buxiganga, organizado pola Área de Cultura da Deputación de Lugo, que busca promover o teatro a nivel municipal e dar pulo aos pequenos grupos teatrais.
Humor2.0 Retranca
para o séculoXXI Os monólogos de CARLOS BLANCO atopan acubillo e
transfórmanse en hip-hop hipnótico nas bases de BUDiÑO DJ Dúas
figuras da escena galega UNEN AS SUAS FORZAS!!
iLalelo!
Falando
de redes sociais... de redeiras cibernéticas, De poemas
imposibles. Facendo participar ao público de salas e festas. Con
risas garantidas polo humor intelixente de CARLOS BLANCO. Coa
calidade musical de BUDIÑO DJ (aportando tamén a súa música en
directo).
iLalelo!
Un espectáculo chamado a mover
masas. A exportar o Galicia Calidade polo mundo. Un show
diferente a todos. Fresco, valente, vivo...
Para non
perdelo!
iLalelo!
Porque estamos no mundo.... iLalelo
- carlos blanco & budiño Dj
facebook/ilalelotour
CHEBRÉVERE. O bo se breve dúas veces chévere
En
escea: Miguel de Lira, Patricia de Lorenzo, Manuel Cortés, Xron.
Músicos ao vivo: Xacobe Martínez Antelo, Max Gómez, Manuel Cebrián
No
2012 o grupo de teatro Chévere cumpre 25 anos de actividade
escénica. En tal data a compañía non podía deixar de visitar
Burela, pois esta vila foi unha das primeiras en confiar no seu
talante teatral e aquí atoparon un dos seus primeiros públicos
cómplices. Foi no desaparecido Cine Mon, alá polo final dos anos
oitenta, convidados polo C.C. Buril, cando Chévere presentou a súa
versión escénica dos míticos superheroes, "O mal non acouga".
Un título premonitorio do que sería a historia de Galiza e, por
extensión, do resto do mundo nestas últimas dúas décadas. Tempo
no que os Chévere tiveron que aprender a facer teatro de verdade
para subsistir. Mellor ou peor, o feito é que chegaron ata aquí
mantendo a súa independencia, deixando no camiño decenas de
espectáculos, centos de actuacións e nada menos que 20 anos de
actividade na Sala Nasa. Como nunha pequena festa de cumpreanos e
como agasallo da compañía a todo o público de Burela e da Mariña,
Chévere ofrecerá unha escolma de pezas breves extraíadas do seu
repertorio clásico e recente. Sketches, cancións, personaxes e
historias feitas a pé de escenario que retratan o xeito de entender
o humor, o amor e os odios destes cómicos incansables que son os
Chévere.
Vacacións no mar
Vacacións
no Mar é un espectáculo de títeres de luva, no que se conxuga o
tradicional estilo da cachiporra, tan eficaz dramáticamente, cuns
caracteres e uns aconteceres renovados para o público de hoxe en
día.
Tanto
as escenografías como os mecanismos e os bonecos son pezas únicas,
deseñados e creados no obradoiro artesán de Mircromina. Este
espírito artesanal chega ata a música do espectáculo: parte dela
foi creada específicamente para o espectáculo por Falsario, artista
que traballa en exclusiva para a Compañía; en canto ó resto, é
unha selección de músicas libres, orixinais de Rymsky-Korsakov
unhas e temas populares interpretados pola formación lucense Kivitka
as demáis.
Deste
xeito, cun sinxelo e eficaz guión, unhas personaxes de marcadas
personalidades e un ritmo trepidante, Mircromina fai a sua
contribución á renovación deste xénero dramático e ó desfrute
das almas nenas.
Sinopse
A
Mariña encantaríalle viaxar polo mundo adiante. Un día, Moncho
chega a porto no seu veleiro “Ovos con patacas”... pero nun
descuido o pirata Ollo Virollo toma prestada a nave e faise ao mar.
Tras 45 min de acción ¿Cumprirá Mariña o seu soño de dar a volta
ao planeta?
Xoves 4 ás 21h30 iLalelo Carlos Blanco & Budiño DJ Venres 5 ás 21h30 Chebrévere. O bo se breve, dúas veces chévere Grupo Chévere Sábado 6 ás 18h00 Vacacións no mar Mircromina Títeres
XIII XORNADAS DE TEATRO.
O RENACER DUNHAS XORNADAS DE TEATRO HISTÓRICAS.
As
Xornadas
de Teatro de Burela
foron organizadas polo Colectivo Cultural Buril desde o ano 1987 ata
o ano 1998. En total, foron doce edicións celebradas anualmente de
forma ininterrompida, tendo lugar as cinco primeiras edicións no
hoxe desparecido Cine Mon e as sete edicións restantes no Auditorio
Municipal. Nas primeiras edicións, as xornadas incluían unha oferta
diversa na que tiñan cabida desde compañías de teatro infantil e
teatro afeccionado (Tanxerina, Barriga Verde... ou os grupos teatrais
da A.C. Amado Lar de Ferreia do Valadouro, o grupo Ártabro Teatro da
agrupación cultural Lumieira ou o propio grupo de teatro do C.C.
Buril) ate compañías profesionais, entre as que encontramos a
Teatro de Ningures, Sarabela, Teatro do Morcego, Talía... A partir
da VII edición, as xornadas pasaron a ser principalmente unha mostra
do teatro profesional galego con obras para o público adulto e
infantil. Tamén debemos sinalar que dentro destas xornadas de teatro
se organizaban actividades complementares, como o “premio das
Letras Galegas” (coa correspondente publicación das obras
premiadas), ou conferencias e mesas redondas temáticas sobre
distintos aspectos relativos ao mundo do teatro.
As
Xornadas
de Teatro de Burela
organizadas polo Buril, non tiveron continuidade no seu momento por
distintos motivos, entre eles os problemas de financiamento, a
aparición das programacións culturais promovidas polas institucións
e a progresiva desarticulación do tecido asociativo.
Durante
os 12 anos en que se celebraron, as Xornadas tiveron unha
considerable transcendencia no acontecer cultural de Burela, cun
importante número de asistentes ás representacións, contribuíndo
á consolidación dun público que demostraba a súa fidelidade ano
tras ano. Aínda que por riba da repercusión local e comarcal, hai
que sinalar que as Xornadas
de Teatro de Burela acadaron
unha importante releváncia
na escea galega, constituíndo, xunto con outras xornadas como a MIT
de Ribadavia,
a Mostra
de teatro de Cee,
o FIOT
de Carballo,
o FETEGA
do Carballiño...
un dos espazos referencias na xeografía do teatro galego.
No
pasado ano 2011, o Concello de Burela, deixou de formar parte da Rede
Galega de Teatros,
á que pertenceu durante moitos anos, e que fixo posíbel que as máis
importantes compañías teatrais galegas actuaran en Burela. Este
feito supoxo a desaparición do teatro profesional da oferta cultural
na pasada tempada 2011-2012. Tendo en conta esta circusntancia, e
dado que Burela conta cunha importante tradición teatral, desde o
Colectivo Cultural Buril consideramos que este ano 2012 é unha boa
ocasión para recuperarmos as Xornadas
de Teatro de Burela,
na que será a XIII edición, dando así continuidade a aquelas
xornadas que comezaban alá polo ano 1987 e que facían unha pausa en
1998. Dalgún xeito, e aínda que xa pasaron 14 anos desde as últimas
xornadas celebradas, aquelas representacións teatrais aínda seguen
ecoando na cabeza de moitas burelás e burelaos.
O próximo sábado dará comezo a programación teatral de
outono organizada polo Colectivo Cultural Buril, que arrinca coa obra de teatro
infantil e familiar Kasi Circo, da compañía Teatro Monart. A cita será
ás 18:00 horas na Praza da Mariña de Burela (no Auditorio Municipal se o tempo
non acompaña). Música, clown, teatro e títeres son os ingredientes do
espectáculo Kasi Circo que está a poñer en escea Teatro Monart en
diversos concellos da provincia de Lugo. Este espectáculo forma parte do
programa Buxiganga, organizado pola Área de Cultura da Vicepresidencia primeira
da Deputación de Lugo, que busca promover o teatro a nivel municipal, e dar pulo aos
pequenos grupos teatrais.
Os días 4, 5 e 6 de outubro terán lugar as XIII
Xornadas de Teatro de Burela, nas que contaremos con recoñecidas
compañías teatrais galegas. As I Xornadas de Teatro organizadas polo
Buril tiñan lugar alá polo ano 1987, celebrándose ininterrompidamente durante
doce edicións ate 1998. Desde o C.C. Buril quixemos recuperar aquelas míticas
xornadas de teatro que chegaron a ser un referente no panorama teatral galego,
dando así continuidade a unha proposta cultural, que 14 anos despois aínda
segue a ecoar na cabeza de moitas burelás e burelaos.
A programación teatral de outono do Buril remata o día 27
de outubro, coa representación da obra Radio Universo da compañía
Nostrum Cai, tamén dentro dos Circuítos Buxiganga.
Kasi Circo.
Sinopse
“A obra Kasi Circo trata a história de dúas
personaxes aparentemente correntes, Silvio e Monik, dous limpadores dun circo
de fama internacional. Unha mañá calquera, dispostos a emprender de novo os
seus rutinários traballos, acontece algo que cambia o rumbo das súas vidas. O
león do circo escapou da gaiola e comeu os artistas; ante tal desenlace, os
limpadores deciden que o espectáculo debe continuar e co beneplácito do público
presente propóñense representar os artistas que tantas veces viron. Aínda que a
intención é o que conta, resultan ser bastantes desastrosos nas súas
representacións debido á súa evidente falta de formación. Aínda así seguen
adiante até o final, final que non deixa indiferente, posto que en realidade
todo foi un soño.
A obra, ademais de entreter e rescatar sorrisos entre o
público, pretende mandar unha humilde mensaxe cara á posibilidade de facer
realidade os soños. Como nos pasou a nós mesmos, primeiro soñamos facer
realidade un grupo teatral e finalmente o soño cumpriuse.”
O próximo sábado 22 de setembro terá lugar en Burela a agardada IV Edición do Aberto do Bonito, organizado polo Colectivo Cultural Buril, e no que se loitará polo prezado bonito do norte, peixe co que serán agasallados os gañadores e gañadoras.
O Aberto de Billarda disputarase a partir das 16h30 na pista deportiva nº 2 do Colexio Vista Alegre e nel participarán varios equipos da comarca no que é a primeira proba puntuábel da tempada 2012-2013 da Conferencia Norleste, organizado pola Liga Nacional de Billarda.
Todas
as persoas interesadas están convidadas a participar no Aberto de
Billarda, para calquera información poden contactar co Buril no
enderezo electrónico ccburil@gmail.com ou no teléfono 616473366.
Para participar só é preciso estar media hora antes do inicio do
Aberto.
A próxima semana arrincan as II Xornadas de História Local de Burela, organizadas polo Colectivo Cultural Buril, que se desenvolverán entre o 7 e o 9 de agosto, ás 20:30 horas na Sala de Conferencias e na Igrexa da Vila do Medio. Serán tres días dedicados á divulgación de aspectos destacados da história da nosa vila, este ano con especial atención aos movementos migratórios e tamén ao coñecemento do noso património.
As dúas primeiras sesións consistirán en dúas conferencias. A primeira delas, impartida pola historiadora burelá Herminia Pernas, versará sobre un dos aspectos fundamentais da nosa História e tamén un dos menos coñecios con relación a Burela, a emigración a América. A segunda sesión estará a cargo da antropóloga ribadense afincada en Burela Luzia Oca, que nos fará unha achega á historia da comunidade caboverdiana de Burela desde un ponto de vista histórico-sociolóxico e tamén da súa integración na sociedade burelá. As Xornadas rematarán cunha visita ás pinturas murais da Igrexa da Vila do Medio, a cargo da historiadora da arte burelá Lucía Bouza, quen falará dos aspectos históricos e iconógraficos das pinturas e dará conta do seu estado de conservación.
XORNADAS DE HISTÓRIA LOCAL. 7, 8 e 9 de Agosto. Burela 2012
Martes 7.Sala de Conferencias, 20:30 h. Facer as Américas. A emigración burelá a Ultrama no primeiro terzo do Século XX. Herminia Pernas Oroza.
Mércores 8. Sala de Conferencias, 20:30 h. Recuperando a história da comunidade caboverdiana de Burela (1977-2012). Luzia Oca González.
Xoves 9. Igrexa da Vila do Medio, 20:30 h. As pinturas murais da igrexa da Vila do Medio. Achega histórico-artística e estado de conservación. Visita guiada a cargo de Lucía Bouza Orosa.
O Colectivo Cultural Buril vem de participar na limpeza de praias que se realizou de jeito simultáneo na costa galega esta sexta-feira, 8 de Junho, coincidindo com o dia mundial dos Oceanos.
Nesta actividade, coordenada pola Asociación para a Defensa Ecolóxica de Galiza, ADEGA, participarom mais de 20 entidades de todo o País, entre as que se encontravam distintos colectivos da Marinha.
O Buril, coincidindo com esta data, realizou a limpeza do coído do Perdouro, debido ao alto interesse que tem este espaço polo seu valor natural, geológico e paisagístico. No total apanharom-se por volta dos 200 kg. em só 3 horas, dos quais a maior parte eram produtos plásticos. A limpeza foi realizada de jeito manual e
selectivo, sem a utilizaçom de maquinária pesada e tendo especial
cuidado com a fauna e a flora existentes, seguindo em todo o momento um
protocolo de actuaçom facilitado pola ADEGA.
Ainda que já tínhamos a suspeita de que havia umha grande quantidade de lixo, ficamos realmente surpreendid@s com o estado em que se acha este espaço natural, que está convertido num auténtico vertedoiro ao que vam chegando todo o tipo de resíduos. Também temos que lamentar que nom nos foi possível retirar todo o lixo existente devido à sua quantidade e ao difícil aceso que apresenta esta zona. Calculamos que só no Perdouro ficam aproximadamente 10 vezes mais a quantidade do lixo retirado, sem contarmos outros espaços próximos como o Cantinho ou o Berbês. Lamentamos o penoso estado no que se acha o nosso mar e a nossa costa e aguardamos que os principais agentes contaminantes e a sociedade em geral tome consciência da gravidade do problema, ao tempo que demandamos que as autoridades competentes tomem as medidas precisas para manterem limpas as nossas costas.
Este martes, terça-feira, celebrou-se em Burela o Maratom de Leitura, organizado polo colectivo cultural Buril, ao que assistiu um grande número de pessoas.
De manhá foi o turno dos centros de ensino da vila. O Maratom começou com o I.E.S. Monte Castelo, que deu leitura a poemas do livro Onde o mundo se chama Celenova, de Celso Emilio Ferreiro, poeta do que este ano se comemora o centenário do seu nascimento. A seguir, forom @s nen@s do C.E.I.P. Vista Alegre @s que lerom textos de distintos autores e autoras: Mil cousas poden pasar, de Jacobo Fernández Serrano, Contos para nenos que dormen deseguido, de Pinto & Chinto, poemas d'Os soños na gaiola, de Manuel María, Un pantasma no colexio, de Manuel Lourenzo, O león e o paxaro rebelde, de Bernardino Graña, Campanas de Bastabales, de Rosalía de Castro, O País dos mandóns, de Paloma Rodríguez... A sessom da manhá finalizava com a leitura de trechos de Nunha noite tan longa, de Agustín Fernández Paz, a cargo dos rapazes e raparigas do I.E.S. O Perdouro.
Já na tarde, pudemos escuitar a pessoas de distintos colectivos, clubes desportivos, clube de leitura e pessoas que participarom a título individual.
Começarom a ler as raparigas e os rapazes do CD Futbol Sala Burela que escolherom textos de Carlos Casares, Adela Figueroa (Vento de amor ao mar), Antoine de Saint-Exupéry e Roald Dahl. A seguir, participantes da Fundación Eu Son leron a Darío Xohán Cabana, Manolo Rivas, Neira Vilas... Outros colectivos que assistirom a esta cita forom a Asociación de Axuda ao Enfermo Mental, com o Principiño, a SCR Ledicia com As Bruxas de Roald Dahl, a Coral Polifónica, a Asociación Camiña, con Carta de Inverno, de Agustín Fernández Paz, Asociación Mariña Jazz, com a Revolta dos animais de G. Orwell, Asociación de Amigas e Amigos de Banda que derom leitura a um artigo de Hernán Naval sobre as escolas e bandas de música, o Observatorio da Mariña pola Igualdade, com um artigo da feminista Coroa González, a Asociación Vagalume e o Clube de Lectura, com textos de Antón Riveiro Coello, Ánxel Fole, Rosalía de Castro e Vicente Risco, o Clube de Baloncesto Burela, com textos sobre a história do basquetebol, Galiza Nova Burela com textos de Cousas de Castelao e poemas de C.E. Ferreiro, e o próprio colectivo cultural Buril, com textos do poémario Fardel de Esiliado, de Luís Seoane, Sempre en Galiza, de Castelao e Longa Noite de Pedra, de Celso Emílio Ferreiro.
Entre as distintas pessoas que participarom a título individual estiverom Cándida Pico, com Tesouros Novos e Vello de Álavaro Cunqueiro, Neves Cando, com O Club da Calceta, de María Reimóndez, José Maseda, com um artigo de Vilar Ponte, María Carme Panizo, com Os Dous de Sempre, Emilio Legaspi com o Meu Carriño de Ramón Cabanillas, Lucía Bouza, com Ou Outros Feirantes, de Álvaro Cunqueiro...
Desce o colectivo cultural Buril queremos agradecer a todas e todos os participantes pola sua assistência a este Maratom de Leitura e destacar a alta participaçom, que superou as 100 pessoas e que nos anima a celebrar o próximo ano um novo Maratom de Leitura.
O próximo martes 8 de maio terá lugar en Burela un MARATÓN DE LECTURA organizado polo Colectivo Cultural Buril, e no que se pretende poñer en valor a lectura e a nosa lingua.
O maratón celebrarase en sesión de mañá (de 11h30 a 14h) e de tarde (de 16h a 21h) no salón de plenos do Concello de Burela e nel participarán máis de 100 persoas que lerán fragmentos de distintas obras da literatura galega.
Na sesión da mañá participarán as alumnas e alumnos dos distintos centros educativos da vila. Durante a tarde, ademais das persoas que independentemente se anotaron no maratón, participarán xogadoras e xogadores dos clubes deportivos como o Burela FS ou o Clube de Baloncesto, así como o clube de lectura, asociacións culturais e musicais e tamén colectivos de persoas con discapacidade.
Desde o CC.Buril animamos a todas as persoas interesadas a achegarse ao salón de plenos durante esta intensa xornada para disfrutar da lectura en galego.
Desde o colectivo cultural Buril temos o prazer de apresentar-vos O Entroido na memoria, documentário áudio-visual realizado polo Buril em 2001. Com esta re-ediçom em formato digital, queremos recuperar este documento com a vontade de fazê-lo chegar aos vizinhos e vizinhas de Burela e a todas as pessoas interessadas nesta temática. Para além do valor afectivo e sentimental que com certeza terá para muitos burelaos e burelás, O Entroido na memoria constitui um documento de grande interesse tanto para o estudo da história local como para a etnografia e a historiografia galegas.
O Entroido na memoria nom é só um retrato do entroido da Burela de finais do século XX, mas também umha viagem ao entroido do passado, contado de viva voz polos nossos velhos e velhas. Aquel entroido popular, espontáneo, esmorgueiro e retranqueiro. O “entrudo chocalheiro” -como cantou o Zeca-, o dos excessos, da burla, do escárnio e do mundo ao revés. Em definitiva, o entroido tradicional, que o Buril quijo recuperar nos anos 80 e 90 do passado século, para que umha das manifestaçons mais genuínas da cultura galega nom caisse no esquecimento nem se visse desvirtuada polas alienantes modas do momento.
O entroido aldeao de outrora, o das carautas e disfarces artesanais a percorrer casas e corredoiras, tomava agora, da mao do Buril, forma de gincana polas ruas e bares de Burela, na que se realizavam as provas mais bizarras e extravagantes que podamos imaginar. Também se recuperavam tradiçons locais como a de “correr a auga”, que em palavras de Ricardo Pena, primeiro cronista oficial da vila, é umha das tradiçons mais ancestrais que partilham os povos marinheiros. Ao berro de “auga aquí”, @s participantes alertavam da sua presença e faziam um chamamento popular à molheira colectiva, estabelecendo umha nova ordem social, na que nom havia privilégios de género, classe social, ou de calquera outro tipo.
Mas a tradiçom também se renovava, e apareciam as comparsas que adaptavam a mofa e a burla populares à crítica social e política mais azeda. Deste jeito, o desfile de comparsas, convertía-se num foro público no que ridiculizar os poderes político, económico ou religioso. O entroido finalizava com o enterro da sardinha, no que a “corporaçom municipal”, eleita por legítima votaçom popular, acompanhava o defunto polas ruas de Burela. A comitiva completavam-na o crego, os gaiteiros e um grande número de vizinhos e vizinhas que ao som do infatigável pranto das choroas, desfilavam a passo lento qual Santa Companha para darem a última despedida ao entroido.
Assim é pois o entroido que podemos ver neste documentário e no que o Buril tanto colaborou. As pessoas que hoje conformamos o colectivo, queremos fazer o nosso humilde contributo ao conhecimento da nossa história recente e à consolidaçom da nossa memória colectiva, lembrando aquelas mulheres e aqueles homens que hai quase 30 anos sairom à rua para berrar alto e forte: “Auga aquí!”
O xoves 16, quinta-feira, às 20:30 horas, terá lugar a apresentaçom pública do DVD O Entroido na memoria, vídeo-documentário realizado polo Colectivo Cultural Buril em 2001. O acto decorrerá na sala de conferências de Burela (antiga biblioteca) e nel projectara-se este documento audio-visual no que nom só veremos um retrato do entroido da Burela dos anos 80 e 90 do passado século, senom que também nos achegaremos ao entroido de pós-guerra contado em primeira pessoa polos seus protagonistas.
Com esta re-ediçom em formato digital, queremos recuperar este documento com a vontade de fazê-lo chegar aos vizinhos e vizinhas de Burela e a todas as pessoas interessadas nesta temática. Para além do valor afectivo e sentimental que com certeza terá para muitos burelaos e burelás, O Entroido na memoria constitui um documento de grande interesse tanto para o estudo da história local como para a etnografia e a historiografia galegas.
Desde o Buril, convidamos a todas as vizinhas e vizinhos a assistirem a este acto, especialmente a aquelas pessoas que participarom e participam activamente no entroido burelao.
O próximo mércores 8 de fevereiro, quarta-feira, o Colectivo Cultural Buril apresentará a revista O Trasno no I.E.S. Monte Castelo. Desde este colectivo queremos fazer chegar aos centros de ensino de Burela esta publicaçom que com periodicidade bimensal foi editada polo Buril entre os anos 1985 e 1990 e que o passado ano via a luz numha reediçom em dous volumes.
Na apresentaçom, que achegará às moças e moços dos centros de ensino este documento imprescindível para o conhecimento da história da nossa vila, estará presente um membro da actual Junta Regedora do Buril ademais de dous dos promotores do Trasno e membros da Junta Regedora do Buril na etapa na que a revista se editou: Emilio González Legaspi e Manuel Nebril.
Esta reediçom d'O Trasno, gratuita para os sócios e sócias do Buril, está à venda nas livrarias para aquelas pessoas que queiram adquiri-lo ademais de contarmos com vários exemplares na biblioteca pública municipal e nos centros de ensino de Burela. Aquelas pessoas que tenham interesse na revista podem consultar os cinco primeiros números (Nº0 a Nº4) em formato de fácil leitura na internet.
Acima disponibilizamos o vídeo da apresentaçom pública da re-ediçom revista, que tinha lugar em Abril do passado ano no auditório da Casa da Cultura de Burela.